30 سبتمبر,2014

الموضوع مش عصاية سحرية هتمسكها وتقول هيلا هوب وتنفخ فيها شوية فيتحول الماوس ف ايديك هو كمان لاداه سحرية تتحرك بيها على سطح المكتب وفى برنامج الفوتوشوب كانك محترف بقالك 20 سنة مثلا !
الموضوع اسهل من كدا ، انت محتاج ايه ؟
1- تحب المجال اللى انت اخترته لنفسك ، محدش اجبرك اكيد عشان تختار مجال التصميم لان مفيش (اب) عربى فى الزمن اللى احنا فيه هيكون مدرك اهمية المجال وانه ممكن يكون مصدر دخل .. الا ما رحم ربى
2- متحاولش تعقد نفسك فى اول كام شهر وانت بتتعلم ، يعنى متجبش تصميم مثلا صاحبه بقاله اكتر من 20 سنة فى المجال وتقول انا مستحيل اعمل زيه ، لما توصل لـ 20 سنة زيه هتعمل احسن منه 100 مرة
3- اوعى تيأس !
4- شوف اعمال ناس محترفة واتعلم منها كويس !
5- تقبل النقد زى ما بيقولوا بصدر رحب يعنى خليك هادى وانت حد بيقولك الوانك زفت ، تصميمك يقرف خلى كل ده خطوات بداية وحاول فعلا تشوف فين الغلط وتصلحه فى التصميم اللى بعده
6- متفرحش لما حد يقولك من اول تصميم انت مفيش منك 2 ، دا منافق حاول تبعد عنه فى الفترة الاولى عشان هتتصدم بعد كدا لما تعرض شغلك على عميل وتكون المفاجئة انك مرفوض !
7-التصميم بصفة عامة بحر ، محدش هيقدر بعد سنة او 2 او 3 يقولك انا كدا مفيش زى 2 ! للاسف المجال اللى مختاره لنفسك صعب انك تصنف نفسك فيه بسهولة ، لازم تنافس مرة و2 و 3 عشان تعرف مستواك .
8- وبرده اوعى تيأس !
9- شغلك هو شهاداتك فى المجال دا ، خد كورسات زى ما انت عاوز وفى الاخر برده لو ملكش اعمال مبهرة محدش هيشغلك .
10- كن قدوة للمبتدئين ، خليك واقف جمبهم ساعدهم متتكبرش انت فى يوم كنت منهم .
11- خيالك هو راس مالك ، لو معندكش خيال مش هتعرف تمشى ، ازاى تشوف الحاجة بعد متخلص هيكون شكلها ايه من قبل ما تبتدى فيها ! هى ديه المتعة .
12- اوعى تفتكر انك بعد كام شهر يكون دخلك فى شهر بالدولار .. للاسف الموضوع محتاج جهد وصبر وتعلم كتير .
13- وفى الاخر اوعى تيأس !

المشكلة الاولى :الالوان !
مشكلتك الاولى وانت بتتعلم التصميم .. دايما بتكون ( الالوان ) خصوصا لو مكنتش قوى الملاحظة ، لكن اكيد مش ديه المشكلة اللى هتخليك متكملش طريقك فى عالم التصميم ، ولذلك لازم تعتمد الاول انك تدرب عينك على الالوان وتشوف ازاى تختار الالوان مع بعضها وتنسقها عشان تعرف تحصل على احسن نتيجة فى التصميم وميكنش الالوان فيها اى مشكلة ،
لكن هتعمل دا ازاى ؟
فى مواقع كتير بتقدم مجموعات الوان جاهزة ، تقدر تختار منها وتستخدمها فى تصميمك براحتك ، طبعا ديه هتوفر عليك وقت لو انت محتار بين الالوان و دا مثال من المواقع ديه
http://bit.ly/1BvOjmz
طول فترة فراغك حاول تشوف اعمالة مليئة بالالوان ، متشوفش اعمال الوانها باهته او ابيض واسود كتير ، حاول تشبع ذاكرتك بالالوان ودقق فى التفاصيل .
بعد فترة وبعد ماستخدمت مجموعات كتير فى التصميم هتكون قدرت تجمع فكرة شاملة عن الالوان اللى تقدر تستخدمها مع بعضها ، وساعتها هتقدر تستخدم مجموعاتك الخاصة .
طبعا الكلام دا مش بين يوم وليله ! اطلاقا دا هيحتاج شهور وممكن سنة عشان تقدر تتعود على الالوان خصوصا لو مجال التصميم من نسبة لك مجرد هواية او مصدر دخل اضافى ومش اساسى .
لكن طبعا مع التدريب والوقت هتقدر تحسن من مستواك جدا ..

المشكلة الثانية : المصدر !
تانى مشكلة هتواجهك لو قررت تخش مجال التصميم المصدر ،
يعنى ايه المصدر ؟
المصدر دا يشمل صور ، ايقونات ، ملفات جاهزة ، … الخ
طيب ودا هتستخدمه فى ايه ؟
ببساطة لو انت شغال فى موقع كبير ومليان ايقونات وصور وكدا ومعندكش وقت هتحتاج حاجات جاهزة عشان تقدر تنجز شغلك خصوصا فى بداية طريقك ..
طبعا الحاجات ديه بتنقسم لقسمين ، حاجات مجانية تماما وتقدر تستخدمها وحاجات لازم تدفع تمنها عشان تقدر تستخدمها …
خلينا فى المجانية احنا عاوزين نبتدى ب اقل التكاليف ..
طيب ايه اشهر مواقع اقدر استخدمها عشان اقدر اجيب ملفات مجانية ؟
انا اقولك .. ديه شوية مواقع تقدر من خلالها تجيب منها اللى انت عاوزوا ..
صور مجانية :
www.sxc.hu
وممكن تستخدم جوجل وفى خيارات البحث تخلى الصورة كبيرة ..
فيكتور مجانى :
http://www.free-vectors.com
ايقونات :
www.iconfinder.com
الموقع دا بعتبره تحفه لانه بيجمع اكتر من 2 مليون ملف ما بين ايقونات وصور وملفات PSD وفيكتور وغيره ..
http://www.freepik.com

شارك الدرس

Share