4 يونيو,2011

قولنا قبل كده ان ” الابداع ” العامل الاساسى لاى مصمم ناجح معروف
بس اكيد فى حاجات تانية كتير .. بتخليك مصمم ناجح ومعروف ” بجانب الابداع ”
هعرض فى الموضوع دا بعض هذه الطرق ..
1)- ادوات عالية الدقة :
التصميم بشكل عام محتاج ادوات عالية الدقة علشان التصميم تقدر تستعمله ويعجب الناس
يعنى اكيد مش هتستخدم صور باهتة قليلة الدقة وهتعرضوا على الناس ، وتقولك دا تصميم رائع وجميل وينفع .. يبقى الناس ديه منافقة ( ابعد عنه مش هيفدوك قد ما هيضروك )
حاول اختيار المواقع اللى ممكن تحصل فيها على صور عالية الدقة تساعدك على التصميم
انا شخصيا اتابع عدة مواقع ” مجانية ” استخلص منها الصور الجميلة التى تصلح للتصميم
من اشهر هذه المواقع التى يمكنك الاعتماد عليها :

www.sxc.hu
www.deviantart.com
طبعا ياريت تكتب كومنت فى الصورة اللى سوف تقوم باستخدمها تقول انت هتستخدم الصورة فى ايه

وبرده عندك مواقع تقدر تجيب منها فيكتور مجانى :

www.free-vectors.com
www.vecteezy.com

عندك برده موقع رائع للبحث عن الايقونات :

www.iconfinder.com

2)- المكان والوقت :
عن نفسى وكتجربة شخصية حاول وانت بتشغل يبقى ذهنك صافى بمعنى ان يبقى الهدف الوحيد اللى ليك وانت بتشتغل انك عاوز تخلص الشغل دا فى زمن العميل يرضى عنه .. و فى نفس الوقت الناتج اللى انت هتقوم بيه يرضيك انت .. خلى لنفسك دايما جدول معين او حاجة معينة بتسمعها وانت بتشتغل علشان تقدر تنجز فى الوقت المحدد ، اما عن المكان فالموضوع بيختلف من مصمم لاخر يعنى ناس ” مش بتعرف تخلص الا و فى دوشة  ، وناس تانية  بتكره تشتغل وفى صوت جمبها ” فحاول انت بقى تجرب نفسك الاول . وتشوف انت بتفضل ايه ؟

3)- الفلوس والجهد :
عن نفسى بعتبره من اهم المشاكل اللى بتواجه اى مصمم ، وبالذات بقى لو بيتعامل مع عملاء مش بيقدروا الجهد اللى بيعمله المصمم
عميل يقولك ” الفلوس كتير
وتانى يقولك ” لا هما كدا كويس
ويقولك ” انا هجبلك شغل تانى
واخر يقولك ” انا هقسط الفلوس
بيكلموك اذنك مثلا بايع جملة ،، فعلشان كدا حاول على قد ما تقدر تقوم بمساوة الجهد اللى انت بتعمله على قد الفلوس وكفه تانية سميها جودة التصميم بمعنى .. ان يبقى الــ 3 متساويين دايما ، ميبقاش فيهم عجز فى واحد على حساب التاني .. هتريح وترتاح مع العملاء ويبقى سعرك فى حدود المعقول برده علشان متخلهوش يقول عليك ” مجنون “.

طيب دلوقتى انا قولت “ فلوس وجهد ، ادوات عالية الدقة ، المكان والوقت

ناقص ايه !!

اه ناقص حاجة مهمة جدا نسيت اقولها :

4)- ” اوعى تبيعك نفسك للى يدفع اكتر “

كلمة جميلة سمعتها فى فيلم عربى قديم ، بس عجبتنى ، لازم يبقى ليك هدف يعنى ماتبقاش عايش على اللى يدفع اكتر وتنسى انك عربى ” مسلم او مسيحى ” فانت عربى ليك اصول وعادات وتقاليد ، متبعش العادات ديه وافتكر ان فى ربنا هيحسبك على علمك دا انت عملت بيه ايه !

شارك الدرس

Share

تعليق واحد فقط

  • يقول الباحث عن الحق:

    شكرا على المواقع
    والنصايح دي